世界盃南美洲區外圍賽,巴西作客未必啃得落「豬頭骨」厄瓜多爾。論質素實力同名氣,客軍當然秤先好多,但厄軍「高原主場」威力勁爆,對上三次外圍賽主場鬥巴西,錄得兩勝一和兼一球不失!巴西今仗有主將卡卡缺陣,而朗拿甸奴、羅賓奴等狀態一般,「讓球主勝」抵捧之餘,細盤亦值得留意。(有線足球台61周一清晨5時直播)
卡卡缺陣細哨冇態
目前南美洲區外圍賽已經踢十場,巴西落後巴拉圭六分暫時排第二,阿根廷再少一分排第三,有留意此區外圍賽球迷,相信唔會驚訝。此區共有四個半世盃決賽周席位,巴西、阿根廷質素超班,根本唔愁出唔到線,一班球星當然唔會場場搏老命。為踢今輪外圍賽,多名外流球星終有機會返老家巴西,「蒲精」阿祖安奴即刻大搞Party,仲邀請唔少隊友如羅賓奴等齊齊玩,就睇到佢備戰幾咁「認真」。
心態唔掂,球星狀態亦唔多得。卡卡今季不斷受傷,今仗亦因左腳傷勢加劇肯定缺陣,而朗拿甸奴AC米蘭因為交唔到貨而失去正選,季尾仲分分鐘被賣走,羅賓奴曼城亦係踢到冇神冇氣,靠佢數胡氣。
夫添出擊後防可靠
厄瓜多爾連續出席○二同○六世界盃決賽周,都係多得高於海拔二千八百米主場之助。九三、○一同○四年世盃外圍賽,厄軍主場三鬥巴西全部不敗,近兩場仲爆冷贏埋波,高原威力非同小可。目前厄瓜多爾於小組排第六,少排第五烏拉圭一分,要連續第三次踢世界盃,未來主場賽事不容有失。軍情方面,韋根路爾斯華倫西亞、曼城卡些度同燕豪芬艾迪臣文迪斯都可上陣,厄軍「夫添」出擊,即使面對巴西都未驚過。
如果覺得厄瓜多爾唔輸,可考慮細盤。巴西以往三次作客厄軍都冇波入,而佢近期後防靠得住,近七仗有六場保清白之身,細盤有1.72倍分頭諗得過。
拉闊推介
厄瓜多爾 讓球主勝
入球細